神奇痊愈　基爾獲加可復出鬥阿仙奴

英格蘭上場熱身賽0比1不敵巴西，右後衞基爾獲加不幸受傷退下火線，一度被指可能缺陣周日(31日)晚英超大戰曼城主場對阿仙奴，不過根據英國《天空體育》最新消息，呢位33歲老將嘅傷勢並非嚴重，有望為「藍月亮」披甲鬥「兵工廠」。

基爾獲加該仗踢咗20分鐘就傷出，疑似整傷左腳腿筋，並提早退隊，返回曼城接受進一步治療。幸好經過檢查之後，基爾獲加嘅傷勢比預期輕，相信可以趕及周日(31日)晚復出對阿仙奴。

基爾獲加雖然年紀唔細，但仍然屬於曼城主力，今季28場英超之中有25場踢正選，「藍月亮」現時落後榜首阿仙奴1分，雙方下場交鋒，對於爭標形勢有關鍵性影響，曼城有基爾獲加助陣，無疑可以提升贏波機會。