葡萄牙主帥識做　放般費返曼聯

葡萄牙將於周三(27日)凌晨國際熱身賽作客斯洛文尼亞，葡萄牙主帥馬天尼斯夠體貼，容許今季踢到殘嘅曼聯中場般奴費南迪斯免役，可以提早返回曼徹斯特休息，以免受傷。

葡萄牙早前熱身賽以5比2大勝瑞典，般奴費南迪斯踢足全場，射入1球及1次助攻，交足功課。據悉馬天尼斯考慮到般奴費南迪斯今季已經為曼聯各項賽事上陣38場，幾乎每場都踢足，所以批准佢唔需要出戰斯洛文尼亞，爭取時間休息。

曼聯將於周日(31日)凌晨英超作客賓福特，之後連接踢2場大戰，分別鬥車路士、利物浦，般奴費南迪斯的確需要叉足電迎接連場惡鬥。

至於上場獲得輪休嘅球星C朗，將會出戰斯洛文尼亞，佢喺社交網上載乘坐飛機到當地嘅相片，身邊仲有曼聯後衞達洛治。