一個原因　迪馬利亞父母遭死亡恐嚇

根據英國各大傳媒報道，阿根廷國腳迪馬利亞嘅父母近日收到死亡恐嚇，威脅如果呢位36歲翼鋒重投阿甲母會羅沙里奧中央，就會殺害佢嘅家人，據悉可能有極端球迷不滿迪馬利亞當年做「叛徒」離開羅沙里奧中央，因而對佢懷恨在心。

迪馬利亞出身於羅沙里奧中央青年軍，出道後為呢支阿根廷球隊上陣36場，2007年轉投葡超勁旅賓菲加，其後效力過皇馬、曼聯、巴黎聖日耳門、祖雲達斯，上年夏天重返賓菲加。

迪馬利亞近日透露有意回巢家鄉球隊羅沙里奧中央，踢到掛靴，但父母隨即收到死亡恐嚇信件，寫住：「講畀佢個仔知，叫佢唔好返羅沙里奧中央，否則我哋殺死你家人，如果唔聽話，下次就唔係收信，而係收子彈同屍體。」發生恐嚇事件後，可能影響迪馬利亞返祖家退休嘅決定。

其實已經唔係第一次發生阿根廷球星嘅家人遭死亡恐嚇，球王美斯太太洛古絲素家人經營嘅超市上年被人槍擊，事後再遭恐嚇。