迪比幫手出100萬歐保釋金　丹尼爾離開監獄

巴西球星丹尼爾因為強姦案罪成，今年2月被西班牙法庭判入獄4年零6個月，近日成功申請獲得保釋，背後全靠「貴人」迪比幫手，為佢墊資100萬歐元(約850萬港元)保釋金。

現年40歲嘅丹尼爾喺律師陪同之下，周一(25日)離開監獄，返回西班牙家中居住，雖然佢可以暫時出獄，但需要支付100萬歐元保釋金。呢位一代「帶刀侍衞 」陷入財困，銀行帳戶甚至變成負數，需要昔日巴塞隆拿及國家隊隊友尼馬出手接濟。

不過，根據卡塔爾傳媒爆料，尼馬認為長貧難顧，拒絕為丹尼爾支付今次保釋金，幸好另一位前巴塞隆拿隊友迪比願意出手相助，代付保釋金，佢先至可以返屋企。