同人唔同命　紅魔新星慘遭西維爾糟蹋

曼聯今季先後將3位潛力新星外借去西甲球隊，但3人命運各異，2位翼鋒格連活特、法根度柏利斯查有出色發揮，但中場米積伯利被西維爾投閒置散，缺乏上陣機會，仲衰過留喺曼聯。

現年21歲嘅米積伯利今季上半季曾為曼聯上陣10次入1球，今年1月被外借去西維爾，會方原本希望佢轉戰西甲，可以獲得更多上陣時間，但卻事與願違，至今僅上陣4次，只有1次踢正選，而且踢咗53分鐘就被換走。西維爾教練科里斯曾經批評呢位突尼西亞國腳比賽態度差，所以棄用佢。

不過，曼聯方面反指科里斯唔畀機會米積伯利，根據借用條款，西維爾今夏有權以2,000萬歐元(約1.7億港元)買斷米積伯利，以目前情況睇，交易應該唔會成事。