夏蘭特態沉射失12碼　哥帥擔心了

曼城除咗3位後衞基爾獲加、史東斯、文路爾艾簡治為國出征期間受傷之外，前鋒艾寧夏蘭特嘅狀態亦令人擔心，呢位射手喺周三(27日)凌晨為挪威出戰熱身賽對斯洛伐克，連番失機，更加射失12碼，腳風非常唔順，周日(31日)晚英超曼城鬥阿仙奴，夏蘭特隨時又變「隱形人」。

挪威上場熱身賽不敵捷克，艾寧夏蘭特食白果，今仗仍然冇料到，即使隊友為佢創造唔少機會，但都失之交臂，包括離門6碼頂高，最離譜係下半場主射12碼，冇力度又冇角度，被對手門將撲出，認真失威。

包括球會及國家隊賽事在內，艾寧夏蘭特近4次上陣都冇波入，狀態甚為低沉，曼城主帥哥迪奧拿可能開始擔心，是否派出夏蘭特擔任正選對阿仙奴。至於今場熱身賽，挪威由阿歷山大索洛夫入波打開紀錄，但最後被斯洛伐克逼和1比1。