C朗失誤累葡萄牙輸波　慘遭男球迷強吻

周三(27日)凌晨國際熱身賽爆出冷門，葡萄牙作客0比2不敵斯洛文尼亞，各項賽事11連勝斷纜。葡萄牙巨星C朗今場冇波入之餘，更因為佢被對手搶走腳下球打反擊，導致失波，慘成罪人。

葡萄牙主帥馬天尼斯今仗對正選作出大輪換，冇份踢上場對瑞典嘅C朗，今仗以正選踢足全場，但表現令人失望，只有2次射門，得1次中目標。戰至72分鐘，C朗試圖盤球突破，卻被對手攔截到，斯洛文尼亞立即打反擊，由施連射入。

葡萄牙反攻不成，8分鐘後再失1球，慘吞兩蛋，C朗只能無奈搖頭。禍不單行，比賽期間C朗遭1位擅闖球場嘅男球迷強吻，身體都失守。

葡萄牙上場熱身賽缺少C朗之下，以5比2大勝瑞典，今場有佢助陣反而輸波，難怪唔少網民認為呢位39歲老將係時候退出國家隊。