格魯吉亞創奇迹首次出線　歐國盃24隊全誕生

周三(27日)凌晨舉行嘅3場歐國盃外圍賽附加賽決賽，格魯吉亞同希臘激戰120分鐘仍然踢成0比0，最終格魯吉亞憑互射12碼贏4比2，首次打入決賽周，聯同波蘭、烏克蘭搭上尾班車，今屆24支參賽球隊全部誕生。

位處東歐嘅格魯吉亞國土只有6.97萬平方公里，人口大約400萬，自上世紀90年代脫離前蘇聯獨立後，進軍國際球壇，以往只屬於魚腩球隊。不過，格魯吉亞近年人才輩出，當中以效力拿玻里嘅翼鋒基華拉斯基利亞最搶鏡，近2季意甲入波都達雙位數，佢近4場歐國外為格魯吉亞射入4球，絕對係球隊出線大功臣。

根據抽籤安排，格魯吉亞身處歐國盃F組，同組對手除咗葡萄牙實力超班之外，土耳其、捷克質素只屬一般，格魯吉亞隨時打入淘汰賽都唔出奇。

另外2場附加賽決賽，威爾斯同波蘭都係打成0比0，需要互射12碼，波蘭贏5比4，意味35歲神鋒羅拔利雲度夫斯基有望最後一次參加國際大賽。至於烏克蘭以2比1擊敗冰島，將連續4屆出戰歐國盃決賽周。