獲拉爵列作非賣品　加拿祖打救坦哈格

曼聯新股東拉特克利夫準備對球隊大改革，預計將會天翻地覆，不過據報有1人被列作非賣品，就係阿根廷新星阿歷真度加拿祖，呢位20歲翼鋒深得「拉爵」喜愛，並視為球隊未來，坦哈格可能因為佢而唔使畀人炒。

阿歷真度加拿祖現時係曼聯必然正選，司職翼鋒，《talkSPORT》報道，「銀河艦隊」皇馬對佢感興趣，不過「拉爵」證實並無出售加拿祖打算，並認為加拿祖係曼聯重建擔演重要角色，係球隊嘅未來。

亦因為加拿祖崛起，連同另一中場新星馬恩奧上位，「拉爵」認為坦哈格發掘新星有功，因此重新考慮曼聯換帥問題，希望坦哈格發掘更多新星，加拿祖變相幫助坦哈格穩住帥位。

阿歷真度加拿祖幼時在西班牙受訓，2020年加入曼聯青訓，2022年獲蘭歷克提拔上一隊，之後球隊由坦哈格接手，當季嘅季前集訓，加拿祖因為開會遲到，成為坦哈格整肅球隊紀律嘅立威對象，遭受懲罰，其後又經歷偶象C朗離隊，但並無影響加拿祖表現，更憑實力取代「圓規」安東尼馬菲奧斯嘅翼鋒位置，企穩正選。