同熱刺續約陷僵局　祖記撬賀積查治

祖雲達斯一直關注熱刺丹麥中場賀積查治，冬窗曾經採取行動但唔成功，嚟緊將再發動攻勢，據報由於熱刺同球員續約談判陷僵局，好大機會今夏放售，祖記準備接貨，轉會費大約2,000萬歐元(約1.7億港元)。

《都靈體育報》報道，祖雲達斯一早睇中賀積查治，曾於冬窗斟介，並持續關注，該28歲丹麥中場同熱刺合約至2025年到期，來季將進入合約年，如果熱刺唔放人，隨時會人財兩失，因此極可能於今夏放售，而且叫價不會太高。

據報熱刺今季改由普斯迪高路執教後，賀積查治上陣時間減少，佢亦於近期更換經理人，似乎係為轉會做準備，除祖記外，AC米蘭、里昂同紐卡素都對佢有興趣。

賀積查治出道早年效力拜仁，不過上陣機會唔多，2016年轉戰英超，最初效力修咸頓，4季後轉投熱刺至今，共為熱刺上陣175場入10球。