倒錢落海　車路士新兵上陣1次就收咧

車路士宣布，中場羅美奧拉維亞因為傷勢康復緩慢，將缺陣今季餘下賽事，呢位20歲比利時國腳上年夏天，以5,300萬鎊(約5.2億港元)轉會費由修咸頓加盟車路士之後，僅上陣1次就全季「報銷」，名副其實係倒錢落海。

車路士初季幾經辛苦，擊敗利物浦，成功簽入羅美奧拉維亞，但佢未上陣已經先後因為肌肉問題及足踝受傷，長抖4個月，直至上年12月底英超主場對水晶宮，先至復出首次為車仔披甲，羅美奧拉維亞該仗只係踢咗32分鐘又再次受傷。根據車路士官方消息，羅美奧拉維亞持續受到大腿傷患困擾，提早收咧。

車路士近年經常簽入貴價水貨，除咗羅美奧拉維亞之外，同樣上年夏天加盟嘅翼鋒尼干古，上「車」後因傷抖多過踢，只曾喺英超上陣7次。至於身價高達7,000萬鎊(約6.9億港元)嘅中堅韋斯利科芬拿，上季英超因傷僅上陣15次，今季開咧前接受手術，至今仍然未曾披甲。