沙維坐兩場波監　趕及國家打吡復出

巴塞隆拿教練沙維上場西甲對馬體會，因為向球證作出激烈抗議及做出不文手勢，導致兩黃變一紅被逐，被判罰停賽2場，其後會方提出上訴，但現時正式被西班牙足總駁回，沙維需要坐兩場波監，幸好可以趕及西班牙「國家打吡」復出領軍，作客鬥皇馬。

巴塞隆拿未來2場聯賽對手只係弱隊拉斯彭馬斯、卡迪斯，相信沙維缺席之下，對球隊影響不大，屆時將由助教奧斯卡領軍，佢係沙維嘅哥哥，相信兩兄弟已經一早制定好應對策略。

最重要係沙維可以親自領軍出戰4月22日凌晨對榜首皇馬，兩隊現時相差8分，巴塞要保持爭標希望，非勝不可。至於歐聯8強兩回合對巴黎聖日耳門，不受停賽令影響，沙維可以自己領軍。