李察利臣聲淚俱下　自爆曾經想死

熱刺前鋒李察利臣今季演出大勇，但原來1年前幾乎想死，呢位26歲巴西國腳接受《ESPN》訪問，透露踢完上屆世界盃之後，覺得人生到咗極限，內心非常抑鬱，甚至有放棄及輕生念頭，幸好接受心理治療，獲得重生。

李察利臣上屆世界盃表現出色，有3球進帳，但球隊8強出局，加上同經理人發生糾紛，多重打擊之下，令佢內心幾乎崩潰，李察利臣話：「當時我剛剛踢完世界盃，係我事業嘅顛峰，但覺得已經到極限，腦海一片混亂、抑鬱，精神幾乎崩潰，經常喺網上亂搜尋，只想睇關於死亡嘅事物，唔可以話想自殺，但的確好想放棄，好彩心理醫生救咗我。」

除咗踢完世界盃深感失落之外，李察利臣2022年夏天加盟熱刺，因為表現欠佳，亦備受壓力，首季各項賽事上陣35場僅入3球，遭各界冷嘲熱諷。不過，呢位射手今季全面回勇，上陣26場已有11球進帳，相信好大機會打破職業生涯單季最多入15球嘅紀錄。