奇雲迪布尼復操　可望上陣鬥阿仙奴

曼城中場奇雲迪布尼因為腹股溝受傷，缺席比利時近日2場熱身賽，根據英國傳媒最新消息，呢位32歲老將已經可以跟隨曼城U23操練，相信之後會重返一隊訓練，可望上陣出戰周日(31日)晚英超主場對阿仙奴。

奇雲迪布尼今季曾經因傷長抖近5個月，今年1月初先至復出，早前又出現腹股溝傷患問題，但情況並唔嚴重，缺席國際熱身賽只屬「預防性質」。據悉呢位中場大腦近日已進行恢復性訓練，包括同曼城U23跟練，以目前進展睇，應該好快可以重返一隊操練，備戰對阿仙奴嘅生死戰。

至於早前為國出征受傷嘅3位後衞史東斯、基爾獲加、文路爾艾簡治周日(31日)晚上陣成疑，門將艾達臣摩拉斯、中場基亞利殊、馬菲奧斯紐尼斯繼續養傷。