曼聯想簽海倫前隊友　取代卡斯米路

曼聯中場卡斯米路已年屆32歲，今季狀態走下坡，根據意大利《米蘭體育報》爆料，紅魔鬼計劃今夏收購阿特蘭大中場古普美拿斯，取代呢位巴西國腳嘅位置。

曼聯新股東拉特克利夫曾經指會方當年收購卡斯米路「有問題」，加上佢今季表現欠佳，早已傳出可能離隊，紅魔鬼開始物色新中場，包括睇中射手海倫嘅阿特蘭大前隊友古普美拿斯。

現年26歲嘅古普美拿斯係荷蘭國腳，2021年由阿爾克馬爾轉投阿特蘭大，表現攻守兼備，近2季意甲入波都達雙數，包括今季上陣25場入10球。呢位硬漢除咗司職防守中場之外，仲可以客串中堅，無疑係代替卡斯米路最佳人選。

古普美拿斯早前表示，上年夏天已經提出離隊，原本拿玻里有意簽佢，但最終未能成事，預料今夏會再要求轉會。《米蘭體育報》指古普美拿斯身價達5,100萬鎊(約5億港元)。

曼聯近年對阿特蘭大球員情有獨鍾，先後簽入阿密特迪亞路、海倫，買埋古普美拿斯都唔出奇。