守得雲開　安東尼下仗重獲正選？

曼聯將於周日(31日)凌晨英超作客賓福特，會方社交網上載海報，公布今場比賽開波時間，採用安東尼馬菲奧斯單人相片，似乎暗示呢位巴西國腳可能重獲正選。

安東尼馬菲奧斯今季大部份時間表現低沉，30次上陣僅入2球及1次助攻，「契爺」領隊坦哈格都頂佢唔順，將呢位24歲翼鋒貶為後備，甚至只能喺「垃圾時間」上陣。不過，安東尼馬菲奧斯上場英足盃8強入波，協助球隊淘汰宿敵利物浦，演出大受好評，令事業出現轉機。

安東尼馬菲奧斯對上一次踢正選係2月英足盃對諾定咸森林，如果今場英超可以擔正，就真係要好好把握機會證明身價。