咁老都要？曼聯觀察皇馬34歲中鋒

曼聯一直欠缺中鋒，早前海倫缺陣即刻輸波就係最佳證明，紅魔今夏將會搵中鋒，據報佢哋已經鎖定目標，睇中由愛斯賓奴外借皇馬嘅34歲中鋒祖斯奴，仲派咗兩個代表去睇辦。

《relevo》報道，祖斯奴今季由愛斯賓奴外借皇馬，借用費50萬歐元(約425萬港元)，買斷費150萬歐元(約1,275萬港元)，而且表現超值，今季已累積13球3助攻，更入選西班牙國家隊，雖然作用同已經離隊嘅賓施馬仲有距離，但都頂得兩嘴。

曼聯上季借入韋格賀斯，雖然該荷蘭前鋒入波唔多，但其實幫曼聯唔少，包括捧走英聯盃同打入英足盃決賽，仲殺入聯賽前4攞到歐聯資格，證明曼聯確實需要中鋒球員。

據報曼聯近日派出兩名球探觀察祖斯奴表現，各項數據都令人滿意，最重要係踢過史篤城同紐卡素，對英超唔陌生，唯一缺點係年紀老咗啲，不過作為海倫後備係諗得過。