布魯日選新帥　雲佬慘遭利用

比甲豪門布魯日近日怒炒主帥朗尼迪拿，暫時由U23教練領軍，並正物色新帥，據報前曼聯及皇馬前鋒「雲佬」雲尼斯達萊係候選人之一，不過布魯日真正心儀嘅係史浩克04主帥謝拉治，「雲佬」只係布魯日嘅談判籌碼。

《HLN》報道，47歲嘅「雲佬」掛靴後投身教練工作，去年擔任燕豪芬主帥，並贏得荷蘭盃同荷蘭超級盃，不過上季尾解約離隊，至今仍然待業，近日成為布魯日主帥候選人之一。

不過報道指布魯日真正目標，係史浩克04教練謝拉治，該42歲比利時少帥球員時代曾效力布魯日，會方希望佢重投母會執教，不過雙方談判遇上阻滯，於是布魯日就搵「雲佬」做籌碼，逼謝拉治作決定。

布魯日近年冇個教練做得長，2022年至今已經換咗4任主帥，其中前年底接手嘅柏加，做咗唔夠3個月就被炒，所以就算「雲佬」做得成都未必係好事。