助教或重返阿積士　坦哈格慘失左右手

英國《太陽報》爆料，曼聯助教雲迪加格可能今季結束之後，重返荷甲勁旅阿積士擔任主帥，佢同領隊坦哈格3年「光頭組合」面臨拆夥，加上另1位曼聯助教艾歷藍斯2月已轉投美職球隊明尼蘇達聯，意味坦哈格短期內慘失左右手。

阿積士今季成績大倒退，現時僅排聯賽第5位，看守教練史捷比好大機會季尾離隊，會方首選邀請雲迪加格回巢領軍。現年52歲嘅雲迪加格曾經執教阿積士青年隊，2021年擔任當時阿積士主帥坦哈格嘅副手，一齊捧荷甲冠軍，隨後兩人一齊過檔曼聯。阿積士睇中雲迪加格夠「熟手」，認為佢可以帶領球隊重上顛峰。

其實阿積士上年10月已經想搵雲迪加格接手執教，但由於正值季中，被坦哈格拒絕，今次再出手，並願意等球季結束後，請雲迪加格回巢，相信坦哈格好難唔放人。事實上，曼聯新股東拉特克利夫計劃重組教練團隊，雲迪加格是否離隊，已經唔輪到坦哈格話事。