安東尼瘋狂加操　準備王者再臨

安東尼馬菲奧斯2022年夏天以8,600萬鎊(約8.5億港元)天價轉會費，由阿積士加盟曼聯之後，表現一直令人失望，但呢位24歲巴西翼鋒並冇氣餒，把握近日國際賽空檔，加強操練，希望以最佳狀態為紅魔鬼搏殺，證明實力。

安東尼馬菲奧斯冇份入選今次巴西國家隊名單，佢前往葡萄牙馬德拉一間豪華健身室「秘密練兵」，並有教練單對單指導佢操練，可見呢位被網民嘲諷為「圓規」嘅球星真係下定決心要改善表現。

曼聯領隊坦哈格早前表示，安東尼馬菲奧斯的確遇上一啲問題，導致失去信心，但佢正在奮鬥，近2星期狀態有提升。安東尼馬菲奧斯上場英足盃8強入波，協助曼聯淘汰宿敵利物浦，睇來已逐漸重回正軌。