羅拔臣又受傷　無緣鬥白禮頓

利物浦左後衞安德魯羅拔臣周三(27日)凌晨為蘇格蘭踢熱身賽對北愛爾蘭，不幸受傷退下火線，經過掃瞄檢查之後，雖然並非嚴重受傷，但預料無法出戰周日(31日)晚英超利物浦主場對白禮頓。

安德魯羅拔臣當時踢到37分鐘受傷，需求軍醫扶住離場，令人擔心呢位30歲左閘可能重演上年10月受傷，導致長抖3個月嘅悲劇。幸好經過詳細檢查之後，安德魯羅拔臣並非重傷，但嚟緊對白禮頓，應該唔使預佢，屆時可能將右閘祖高美斯移去左路，新星干拿巴特利出任正選右後衞。

不過，利物浦都有好消息，養傷6星期嘅中場居迪斯鍾斯可以復出，前鋒達雲紐尼斯、中場賴恩格雲貝治亦已經傷愈，有望上陣對白禮頓。