曼聯「神操作」想用格連活特交換祖記中堅

根據英國《太陽報》爆料，曼聯計劃今夏收購1位新中堅，頭號目標係效力祖雲達斯嘅基爾臣比爾馬，由於呢位27歲巴西國腳身價不菲，紅魔鬼有意用格連活特作為交易籌碼，減少轉會費支出。

曼聯2位中堅利辛度馬天尼斯、華拉尼成為「玻璃腳」經常受傷，後者更加可能今夏離隊，莊尼伊雲斯年屆36歲，難當大任，單靠哈利馬古尼、域陀連迪路夫難以應付多線作戰，有必須簽入中堅。

基爾臣比爾馬2年前由拖連奴轉投祖雲達斯之後，一直有出色發揮，唔止防守穩陣，並有不俗助攻力，近2季為祖記上陣72場有7球進帳。

根據「轉會權威」記者羅曼諾(Fabrizio Romano)爆料，基爾臣比爾馬現時合約毀約金為6,500萬歐元(約5.5億港元)，祖記唔會以低於呢個價錢出售佢。曼聯為免出現財政違規，打算以格連活特作為交易籌碼，加少量現金，收購基爾臣比爾馬。

早前已傳出曼聯計劃出售格連活特，唔介意將佢送去祖記，換來1位防線猛將。