尼馬長留邁阿密　黐實碧咸兩公婆

養傷中嘅巴西球星尼馬，近日走訪邁阿密，個人社交網發布同碧咸夫婦合照，仲做埋美國職棒開球禮嘉賓，估計係為將來加盟國際邁亞密鋪路。

尼馬去年夏天離開巴黎聖日耳門，轉投沙特豪門希拉爾，簽約2年，年薪1.6億歐元(約13.6億港元)，可惜去年10月為國家隊上陣期間左膝十字韌帶撕裂提早收咧，不過佢養傷期間仲四圍去，睇佢IG所見生活多姿多采。

據報尼馬近期一直喺邁阿密，入場睇NBA熱火對勇士，又擔任職棒開球嘉賓，仲喺投球區露兩手掟波，兼獲贈10號棒球球衣，不過最搶眼都係同碧咸夫婦合照。

尼馬之前講過，美斯曾邀請佢加盟國際邁亞密，當時佢並無確實答案，但依家同國際邁亞密班主碧咸見面，睇嚟雙方就此話題都有一定交流，尼馬同希拉爾合約至2025年到期，到時佢只係34歲，到時合作絕對有可能。

此外，尼馬又PO出同巴西當紅歌手Anitta合照，巴西傳媒乘機大造文章，認為兩人「有路」，不過尼馬身為派隊動物，又有咁多女伴，呢啲緋聞難佢唔到。