曼聯平賣雲迪碧克　仲有得議價

曼聯季中外借到法蘭克福嘅26歲荷蘭中場雲迪碧克，由於表現欠佳，將不獲法蘭克福買斷留用，今夏送返曼聯，不過紅魔都唔會留佢，據報會將佢平價出售，標價850萬鎊(約8,500萬港元)，仲有得議價。

雲迪碧克今季喺曼聯幾乎冇得出，季中外借到法蘭克福一樣冇運行，據報法蘭克福肯定「彈鐘」，當佢重返曼聯後，基於財務公平條例將被掛牌出售，標價850萬鎊，比起2020年買入價3,500萬鎊大幅減價超過2,000萬鎊，而且有興趣買家仲可以議價，因為雲迪碧克《轉會市場》最新估價只值600萬鎊(約6,000萬港元)。

荷蘭傳媒報道，雲迪碧克潛在買家，就係佢母會阿積士，雙方聯繫已有一段時間，阿積士今季戰績低迷，今夏將會重建，有機會平價回購雲迪碧克。