Kepa不獲皇馬留用　自己搵出路

今季由車路士外借到皇馬嘅西班牙門將阿列沙巴拿加，預計外借期滿後不獲留用，將被送返車路士，而佢同車仔合約尚餘最後1年，續約機會不大，到時佢要自己搵定出路。

《阿斯報》報道，Kepa季初喺皇馬頂替受傷嘅泰拔高圖爾斯，表現唔差，上陣頭10場有5次零封，可惜之後佢受傷缺陣，後備門將盧連把關表現出色，Kepa自從1月底之後，再冇上陣機會，消息指皇馬至今冇人同佢商討去留問題，估計借用期滿將被送返車路士。

Kepa2018年由畢爾包轉投車路士，轉會費高達8,000萬歐元，幫車路士贏過歐霸盃同歐聯冠軍，球隊近年經歷易主同成績下滑，Kepa今季更被外借到皇馬，29歲嘅佢重返車路士後預計唔會受重用，到時可能又要搵班落。