杜沙特破城有計　阿仙奴想贏波要靠佢

阿仙奴即將於英超迎戰曼城，兵工廠想贏波，除咗靠布卡約沙卡、馬田奧迪加特、夏維斯數胡之外，翼鋒李安度杜沙特亦擔當重要角色，呢位29歲比利時國腳近3次為兵工廠對曼城，合共射入1球及1次助攻，隨時成為今仗主角。

李安度杜沙特2023年1月由白禮頓加盟阿仙奴，多數以後備上陣，但往往有重要貢獻，包括上年8月社區盾對曼城，佢75分鐘後備上陣，踢到補時11分鐘入波，協助阿仙奴逼和1比1，最終兵工廠憑互射12碼勝出，杜沙特亦有份主射入網。李安度杜沙特效力白禮頓期間，都曾經2次射入曼城大門，可見佢破「城」有計。

李安度杜沙特今季各項賽事已為兵工廠入11球，包括歐聯16強次回合射入全場唯一球，協助球隊晉級，充分反映其重要性。杜沙特以往多數擔任加比爾馬天尼利嘅副選，呢位巴西國腳近期養傷，令杜沙特獲得更多擔正機會，相信會落力演出，爭取鞏固正選位置。