又再絕處逢生！利物浦反勝海鷗

周日（31日）英超頭場，利物浦憑路易斯迪亞斯同穆罕默德沙拿各建一功，喺主場以2比1反勝「海鷗」白禮頓，今季聯賽落後情況下搶分最多球隊，狂搶26分，堪稱逆轉王。

利物浦今仗有安德魯羅拔臣因傷倦勤，祖高美斯繼續串演左閘，並以穆罕默德沙拿、達雲紐尼斯及路易斯迪亞斯三叉戟攻堅，點知開波唔夠2分鐘白禮頓即偷襲得手，韋碧克遠射破網。之後沙拿多番浪費機會，去到27分鐘紅軍一次角球攻勢，白禮頓後衞祖爾韋特文想解圍卻變「助攻」，畀路易斯迪亞斯攝到靚位快腳一彈扳平。

易邊後利物浦繼續施壓，無論係阿歷斯麥亞里士打同沙拿嘅頭槌，定蘇保斯拉爾於禁區外放冷箭都斜出，不過紅軍嘅努力終於有回報，65分鐘麥亞里士打直線妙傳畀沙拿得手，反先2比1。之後有迪亞斯快射破網，可惜越位在先食鋪詐胡，末段沙拿一記近射被救出，最終紅軍保住2比1勝局。