曼聯下季球衣玩復古　要重演20年前復興之路

今季英超已經進行咗四份三賽程，網上流傳曼聯下季新主客球衣款式，同20年前設計非常相似，據悉係紅魔鬼新股東拉特克利夫下令採用復古設計，希望球隊重演當年復興之路。

從網上圖片可以見到呢件疑似曼聯新主場波衫，雙肩前面都有黑色粗闊條紋，最巧合係心口新贊助商Snapdragon嘅標誌竟然同2003年Vodafone標誌非常相似。

曼聯新球衣相片流出之後，獲得唔少紅魔球迷稱讚，有人話：「畀到我復古感覺，我好喜歡，有Vodafone時代嘅氛圍。」

至於新作客球衣以灰藍色為主，配搭紅色字及條紋，好似2005/06年球季作客款式，當年C朗同朗尼正在冒升，為球隊創造新王朝。

盛傳曼聯新主客球衣設計，都係由新股東拉特克利夫拍板，希望球隊好似2003至06年走出低谷，重新復興。