伊巴親自斟介　干地同意下季執教AC米蘭

AC米蘭今季成績令人失望，歐聯分組賽出局之外，意甲已落後榜首國際米蘭14分，盛傳今季結束後，教練皮奧利可能下台，根據意大利媒體《TeleLombardia》爆料，AC米蘭名宿兼顧問伊巴謙莫域近期親自遊說干地加盟，呢位54歲意大利名帥初步同意下季執教AC米蘭。

雖然皮奧利仲有1年幾合約，但如果球隊今季四大皆空，相信佢今夏就要提早執包袱。AC米蘭亦開始物色新帥，頭號目標係干地，並由伊巴謙莫域親自力邀佢來投，據悉兩人見面後，干地滿意對方開出嘅條件，包括開水喉畀佢簽入5位新兵，涉及2位後衞、1場中場、2位前鋒。

干地曾經率領祖雲達斯3次奪意甲冠軍，擔任車路士領隊亦贏得英超冠軍，亦為國際米蘭捧2020/21年球季意甲冠軍，可以話「金牌主帥」，A米想贏聯賽冠軍，干地絕對係新帥不二之選。