馬天尼斯變玻璃人　復出即傷再抖1個月

曼聯今季防線傷患頻繁，中堅利辛度馬天尼斯上場啱啱復出，近日練波即告再傷，將要休息至少1個月，加埋上仗傷出嘅域陀連迪路夫亦要抖1個月，「紅魔鬼」又要面臨嚴峻後防荒。

英國傳媒報道，利辛度馬天尼斯喺訓練中小腿受傷，養傷期至少1個月。呢位阿根廷國腳季初因足踝受傷長抖接近4個月，今年初復出踢咗幾場，又因膝傷抖成2個月，上輪對賓福特復出踢咗20分鐘多啲，估唔到又喺操練受傷，慘成「玻璃人」。

喺對賓福特一仗傷出嘅瑞典中堅域陀連迪路夫，經檢查後發現大腿筋拉傷，同樣要休息至少1個月，加上華拉尼同莊尼伊雲斯都有傷在身，曼聯依家只剩哈利馬古尼一個健康中堅。