愛華頓又失分　「降班」前創英超神奇紀錄

周三(3日)凌晨英超賽事，愛華頓憑完場前一記12碼，作客1比1逼和紐卡素，但聯賽不勝走勢增加至13場，護級前景仍然險峻。今場係愛華頓第4,700場英格蘭頂級聯賽賽事，係英格蘭球會No.1，但唔少球迷睇死「拖肥糖」會降班收場，呢個紀錄隨時係降班前最後禮物。

紐卡素今場15分鐘就由阿歷山大伊沙克開紀錄，愛華頓去到88分鐘有艾舒利楊格博到12碼，由卡維特利雲操刀追成1比1。愛華頓喺聯賽已連續13場不勝，領隊戴治賽後表示：「由我接呢份工作開始，已經知道會好難行，聯賽仲有好多場可以搶分，我知道球隊有能力贏波，而且向緊正確方向前進。」

英國《太陽報》報道，自英格蘭聯賽喺1888年成立，愛華頓歷來只有4季缺席頂級聯賽，今仗係佢哋第4,700場頂級聯賽賽事，屬英格蘭球會之最，佢哋自1951年後未試過降班，但網民就唔睇好前景：「如果戴治繼續咁踢，愛華頓嘅頂級聯賽日子將會完結」、「好遺憾呢個紀錄將會停止」。