神憎鬼厭？曼聯惡意挖角四面樹敵

曼聯新老闆拉特克利夫上場後，志切為球會進行重建，近期頻頻向其他球會高層進行挖角，消息指修咸頓總監韋確斯日前已辭職，將成為曼聯新技術總監。不過英國《太陽報》指，曼聯四出挖角嘅行動引起多間球會不滿，認為曼聯惡性挖角態度傲慢。

曼聯喺1月份由死敵曼城挖走貝拉達，依家等過「冷凍期」就會成為新CEO；2月份又搶紐卡素總監艾斯禾夫，後者提出辭職後已被紐卡素暫停工作，進入可能長達2年嘅「冷凍期」；近日修咸頓總監韋確斯亦提出呈辭，傳聞將取代費查成為曼聯新技術總監，不過韋確斯同樣要進入1年「冷凍期」，除非曼聯同意賠償1年嘅人工。

英國《太陽報》消息指，曼聯對其他球會高層嘅挖角行為，已引起球圈關注，紐卡素同修咸頓對「紅魔鬼」私下接觸球會重要人物嘅做法表達強烈不滿。英超規例只要求球會對球員、教練團等挖角，需要先得對方所屬球會批准，但管理層嘅挖角就未有限制。