美臣蒙特宣傳英格蘭新衫　有望踢歐國盃？

今季轉會曼聯後表現差勁兼傷患纏身嘅美臣蒙特，上場聯賽終於「開齋」後，再被影到為英格蘭國家隊新波衫拍宣傳照，似乎意味佢有機會重返國家隊，出戰夏天嘅歐國盃決賽周！

美臣蒙特今次「重返」國家隊拍宣傳片，爆料者係英格蘭女足球星艾娜東妮，佢為自己嘅網上節目拍片期間，無意中曝光美臣蒙特着住英格蘭新作客波衫宣傳嘅畫面，唔少網民見到後都認為，修夫基有意重召美臣蒙特入國家隊。

美臣蒙特對上一次代表英格蘭，已經係2022年12月對法國嘅世盃賽事，不過佢近期復出後狀態有起色，上仗對賓福特更有波入，曼聯領隊坦哈格多次強調美臣蒙特只要操起狀態，會係曼聯嘅重要棋子。