【官宣】車仔綁實「新泰利」　今季2度續約

車路士近年雖然瘋狂燒錢買球星，不過對自家青訓同樣重視，球會周二(2日)宣布同20歲新星基爾基斯續約，呢位「新泰利」喺9月份先同球會續過1次約，今次再簽長約係對佢能力嘅肯定。

可踢右閘的中堅嘅基爾基斯，上年12月為車路士首演後，至今已有12次上陣紀錄，雖然佢喺季初已同車路士簽約到2025年，但車路士周二宣布再同佢續約至2026年，外加1年自動續約條款。基爾基斯表示：「今次續約對我同家人都係一大成就，車路士每次開出新約我都唔需要考慮，我喺球隊感覺愈嚟愈好，我想繼續咁進步。」

車路士喺英足盃殺入4強，基爾基斯就有4次上陣紀錄兼有3次踢正選，據報車路士計劃下季將佢外借磨練，目前已有3至4間英冠球會打佢主意，希望1至2年後基爾基斯可以回歸車路士擔大旗。