曼聯唔再着「綠白戰衣」　球迷叫好！

曼聯上場聯賽作客1比1打和賓福特，捱打演出受到一致劣評，有唔少球迷覺得該仗嘅綠白色波衫「唔老利」，着親呢件波衫都冇乜好波。好消息係，曼聯將唔會再着呢套「綠白戰衣」，餘下作客比賽都會着紅色或者第3作客嘅白色。

曼聯今季推出「綠白戰衣」後，球迷普遍唔受落，甚至被評為近年「最肉酸」波衫，不幸嘅係曼聯今季着呢件戰衣經常表現差勁，包括季初作客阿仙奴輸1比3、上年12月作客森林輸1比2、上仗對賓福特被狂轟31次攻門等等，自然令球迷印象更差。

據英國《每日郵報》報道，曼聯將唔會再着呢件「綠白戰衣」出賽，今季餘下4場聯賽作客(車路士、般尼茅夫、水晶宮、白禮頓)，曼聯都可以着番傳統紅色波衫或白色作客波衫，英足盃4強另外3隊又屬於「藍衫軍」，肯定唔會同「紅魔鬼」撞色。