阿仙奴輪換輕取盧頓　路維獲球迷起立致敬

周四(4日)凌晨英超，阿仙奴主場2比0擊敗盧頓，暫時壓倒踢少場嘅利物浦重登榜首。阿仙奴今場作出多個輪換，難得正選上陣嘅伊美路維表現落力，兩個入球都係由佢策動，尾段被調離場嗰陣獲主場球迷起立鼓掌，賽後亦獲選為今場最佳球員，表現獲得肯定。

阿仙奴今場收起迪格蘭賴斯、布卡約沙卡、加比爾捷西斯、佐真奴同加比爾馬天尼利等主力，不過對住盧頓游刃有餘，24分鐘伊美路維前場反搶策動反擊，最終由馬田奧迪加特接應夏維斯傳送射入；44分鐘伊美路維左路傳中，逼到盧頓嘅橋岡大樹擺烏龍，協助阿仙奴贏2比0。

伊美路維今場踢85分鐘，係佢自2022年4月以來最長時間上陣聯賽，而且獲選為最佳球員，佢賽後表示：「今季對我哋呢啲上陣唔多嘅球員係好困難，不過球隊就好似一家人，大家心態都係隨時做好上陣準備，用表現向領隊證明我哋值得上陣。今場入唔到波有少少失望，但創造兩個入球都好值得開心，保持不失亦相當重要，我為自己今場表現高興。」