利華古遜大勝闖德盃決賽　3冠王又近一步

今季勢如破竹嘅利華古遜，周四(4日)凌晨喺德盃4強主場4比0大破杜塞爾多夫，下月會同凱沙羅頓爭奪冠軍。利華古遜今季所有賽事40場不敗，德甲捧盃近在咫尺、德盃又殺入決賽，加上歐霸盃已入8強，大有機會問鼎3冠王。

利華古遜今場贏得輕鬆，7分鐘就由謝利美費林邦開紀錄，艾里同科利安華迪斯入波為主隊半場領先3比0，換邊後科利安華迪斯再入多球12碼，協助利華古遜大勝4比0，今季所有賽事40場不敗，當中35場勝仗，亦追平球會史上單季最多贏波紀錄(01/02球季)。

利華古遜目前喺聯賽領先拜仁慕尼黑13分，最後7輪聯賽贏多3場就肯定捧盃；德盃決賽就喺5月26日舉行，利華古遜會同凱沙羅頓爭逐冠軍；至於歐霸盃8強就要面對英超球會韋斯咸，首回合喺下周五(12日)上演。