大膽！坦哈格挑機新老闆：唔好搞亂曼聯！

曼聯新老闆拉特克利夫上場後，由上至下大力推行改革，不過喺對車路士嘅聯賽前，領隊坦哈格竟然向新老闆挑戰，叫佢唔好學車路士班主保利咁「搞搞震」，打亂球會嘅成長進程！

美國班主保利入主車路士，前後有5個主帥領軍，花咗超過10億鎊買人後，依家只排聯賽第12位，坦哈格喺記者會被問到點睇保利嘅「前車之鑑」，呢位荷蘭教頭就大膽回應：「我相信拉特克利夫要跟隨球隊嘅成長過程，我哋好好好嘅年輕球員上緊位，曼聯依家向住好嘅方向前進，行緊正確嘅軌道，嚟緊就要行下一步，請唔好搞亂呢個進程！」

盛傳曼聯如果拎唔到下季歐聯參賽資格，坦哈格就會被炒魷，坦哈格表示：「我對自己有好高要求，如果未能參加歐聯我會好失望，曼聯依家個位置唔好，但我哋會奮鬥到最後一刻，剩低每一場波都會以勝利為目標，因為我哋係曼聯！」