美斯繼續養傷　邁亞密中冠盃8強落敗

周四(4日)凌晨中冠盃8強首回合賽事，美職球隊國際邁亞密喺「球王」美斯缺陣下，主場1比2不敵墨超勁旅蒙特雷，如果美斯趕唔切喺下星期嘅次回合賽事復出，國際邁亞密就凶多吉少。

已經養傷3個星期嘅美斯，賽前雖然恢復操練，不過今仗仍然只能喺場邊觀戰，睇住球隊喺上半場領先情況下，被蒙特雷喺下半場連入2球，首回合慘輸1比2。

國際邁亞密教練馬天奴賽後表示：「美斯嘅情況要逐場睇，星期六嘅聯賽同下星期嘅次回合都一樣，佢依家每日都有好轉，但今仗仍然風險太大。」

美斯今季只上陣5場賽事，但已有5個入波同2次助攻，幫球隊拎到3勝2和成績，相反喺佢缺陣嘅5場，國際邁亞密只得1勝1和3負。