【有片】加歷查被轟歧視黑人球僮　肥普力撐

車路士今季成績差勁，上星期對般尼更爆出種族歧視風波，隊長干拿加歷查被指無視黑人球僮擊掌要求，而且態度冷漠，只係同另一白人球僮交流；不過領隊普捷天奴就為愛將辯護，批評外界鍾意無事生非。

車路士對般尼賽前，干拿加歷查喺球員通道同2名球僮準備出場，當佢同白人球僮笑晒口握手後，對黑人球僮舉手等擊掌就完全無視，並且再次轉身搭住白人球僮膊頭，影片曝光後引嚟大批網民炮轟，指干拿加歷查有種族歧視之嫌。

干拿加歷查被質疑歧視黑人球童片段：https://twitter.com/i/status/1774099003669442697　

車路士領隊普捷天奴日前就為干拿加歷查反擊：「呢件事令我難過，冇人會刻意做啲咁嘅事，干拿加歷查同兩個球僮影咗好多相、拍咗好多片，一個球員需要專注嘅事情太多，但好多人都鍾意無事生非，搵嘢去攻擊其他人，我哋好清楚干拿加歷查嘅為人。」