12碼之王！高爾彭馬：我永遠唔會宴客！

車路士喺英超戲劇性4比3反勝曼聯，高爾彭馬連中三元成為大英雄，佢今場2度射入12碼後，今季8次操刀全部命中，依家更以16個入波升上英超射手榜次席。呢位21歲小將表明唔介意繼續靠12碼入波，賽後更豪言：我永遠唔會宴客！

高爾彭馬喺車路士單天保至尊，今季英超已有16個入波同8次助攻，係繼00/01球季嘅哈索賓基後，車路士史上第1季效力球隊貢獻最多入球球員。雖然高爾彭馬今季有一半入波嚟自12碼，但呢位英格蘭國腳表示：「入波就係入波，今次係我生涯首個帽子戲法，所以非常開心，我今季射過唔少12碼，但只要有機會主射，我永遠唔會宴客。」

高爾彭馬喺英超射12碼8射全中，史上只有2個比佢操刀更多次嘅球員可以保持100%命中率，分別係貝碧托夫(9射全中)同耶耶托尼(11射全中)，車路士領隊普捷天奴賽後表示：「高爾彭馬其中一項最強特質，就係佢嘅心理質素，佢處理壓力嘅能力實在太勁，睇完今場嘅表現，冇可能唔承認佢係頂尖球員。」