熱刺爭前4受打擊　李察利臣因傷無緣鬥森林

熱刺繼上場英超被韋斯咸逼和1比1之後，再受打擊，前鋒李察利臣因為受到膝傷問題困擾，無緣周一(8日)凌晨英超主對諾定咸森林，難免削弱攻力，影響爭奪前4位下屆歐聯入場券機會。

李察利臣曾於2月中受傷，缺陣1個月，呢位26歲巴西國腳復出之後，近3場都係後備上陣，由於傷勢仲未完成康復，導致影響發揮，所以領隊普斯迪高路決定嚟緊對諾定咸森林，收起李察利臣，畀佢有足夠時間處理傷患問題。

另外，翼鋒比蘭莊臣上仗傷出，但應該可以上陣鬥森林。熱刺近3場聯賽僅取得1勝1和1負，落後第4位阿士東維拉2分，但踢少對方1場，仍然有望反超前，重返前4位。