美斯傷愈復出　國際邁亞密有救

美職豪門國際邁亞密宣布，養傷3星期嘅阿根廷球王美斯已經傷愈，並可以出戰周日(7日)早上美職主場對科羅拉多急流，對於近期成績走下坡嘅國際邁亞密，無疑係一場及時雨。

美斯自從3月14日中冠盃對拿舒維爾入波之後，就一直因傷缺陣，甚至無法為阿根廷出戰上月喺美國舉行嘅2場熱身賽。幸好呢位36歲前鋒近日已經復操，球隊亦公布美斯入選對科羅拉多急流嘅大軍名單，可以隨時候命。

美斯缺陣國際邁亞密近4場比賽，球隊只取得1勝1和2負，包括近2場聯賽都失分，隨住美斯復出救亡，國際邁亞密成績應該可以反彈。