安察洛堤再創紀錄　將成首位歐聯200戰主帥

周三(10日)凌晨歐聯8強首回合，皇家馬德里將於主場迎戰曼城，今仗對於皇馬教練安察洛堤有特別意義，因為佢將會成為1992/93年球季歐聯改制以來，賽事史上首位領軍200戰(不包括外圍賽)主帥，當然希望以贏波慶祝刷新紀錄。

安察洛堤曾經帶領8支球隊出戰歐聯正賽，包括帕爾馬、祖雲達斯、AC米蘭、車路士、巴黎聖日耳門、拜仁慕尼黑、拿玻里、皇馬，其中以執教AC米蘭期間出戰最多場歐聯，達到73場，並奪得2次冠軍，亦協助皇馬2次捧盃，所以「肥安」亦係歐聯史上唯一4次奪冠嘅主帥。

現年64歲嘅安察洛堤將迎來教波生涯第200場歐聯，賽前佢話：「我仲記得執教第1場歐聯係帕爾馬對布拉格斯巴達，依家就來達到第200場，的確意義重大，可以喺球壇工作咁多年，已經算成功，特別係我呢個年紀。」安察洛堤上年12月同皇馬續約至2026年6月，仲有大把機會再改寫紀錄。