菲歷斯撬貝拿度施華去巴塞：我會收佣金！

巴塞隆拿近期成績回勇，由馬德里體育會借用嘅祖奧菲歷斯決心留隊之餘，近日受訪更自爆正遊說老友貝拿度施華過檔，該曼城中場合約內有5,000萬鎊買斷條款，據報將成為巴塞隆拿頭號獵物，祖奧菲歷斯更表明如果轉會成事，佢會照收佣金！

葡萄牙國腳祖奧菲歷斯日前受訪爆料：「貝拿度施華問我巴塞隆拿邊度好住、邊度有嘢食、治安點樣......佢問我好多生活細節，我有冇成功遊說佢加盟？我相信有。我講所有嘢都係事實，如果佢加盟，相信所有人都會開心，而且我仲會問巴塞隆拿拎佣金！」

貝拿度施華同曼城合約到2026年夏天，不過合約內有5,000萬鎊買斷條款，權威記者Fabrizio Romano報道，巴塞隆拿對貝拿度施華的確好有興趣，但關鍵係財政公平條例嘅執行，巴塞隆拿目前仍未知道夏天有幾多資金，如果「彈藥」足夠，貝拿度施華會係最大目標。