同「未來總監」有路　查頓辛祖有望回歸曼聯

英格蘭球星查頓辛祖因為同曼聯領隊坦哈格不和，今年1月被外借去多蒙特，盛傳「紅魔鬼」亦打算將佢賣走。不過最近形勢大逆轉，傳聞曼聯將聘請修咸頓嘅韋確斯做總監，而韋確斯正正係查頓辛祖「恩師」，好可能會畀機會佢喺曼聯證明自己。

已向修咸頓提出辭職嘅韋確斯，2015年至2017年間喺曼城青年軍同查頓辛祖共事，查頓辛祖喺曼城青年軍首演就係韋確斯做教練，韋確斯對佢仍然有高度評價。據報無論坦哈格留隊與否，佢嘅轉會權力都會被褫奪，如果韋確斯真係成為曼聯總監，查頓辛祖就有運行！

正準備應付歐聯8強嘅多蒙特，據報希望查頓辛祖可以繼續留隊，但由於財政緊拙，佢哋嘅預算只有3,000萬鎊，同曼聯嘅索價有一大段距離，亦增加查頓辛祖重返曼聯嘅機會。