雙紅會頂得住　曼聯將同19歲小將續長約

曼聯上場「雙紅會」2比2賽和利物浦，由於後防傷兵滿營，19歲剛果小將甘華拉臨危受命，拍住哈利馬古尼踢雙中堅，結果頂得兩嘴，據報曼聯準備同甘華拉續長約。

甘華拉小時喺法國受訓，2020年過檔曼聯青訓，去年底對韋斯咸獲提拔上一隊首次亮相英超，至今聯賽及盃賽為「紅魔鬼」上陣8場。

曼聯今季防中有馬恩奧上任，翼鋒阿歷真度加拿祖更被視為球隊未來，身高1米92嘅甘華拉就係後防新血，「雙紅會」獲派正選上陣，對住利物浦都唔使輸，佢呢位小將日後發展打下良好基礎。

資料顯示，甘華拉只係低薪球員，周薪只有1400鎊(約1.38萬港元)，合約到2025年到期，曼聯計劃同佢續約，周薪至少1萬鎊起跳。