德國將同拿高斯文傾續約　拜仁咩反應？

德國領隊拿高斯文今夏歐國盃後約滿，佢曾表示想喺歐國盃前確定自己未來，仲話希望重返聯賽執教，據報德國足總打算先下手為強，短期內同拿高斯文傾續約，希望佢長期領軍。

《圖片報》報道，德國足總近日同體育總監禾拉續新約，任期至2026世盃結束，下一步就想留住拿高斯文，不過呢位36歲少帥有眾多選擇，德國足總最大競爭對手係拜仁慕尼黑。

杜曹落實今夏解約，而沙比阿朗素宣布留效利華古遜，拜仁內部有人提議重新聘用拿高斯文執教，同白禮頓領隊迪薩比2選1，拿高斯文始終無法立即確定重返拜仁，但喺佢面前就有德國足總嘅聘約。

禾拉對此表示：「對於一位年輕又出色嘅教練，要喺咁多選擇之下做出決定係好難嘅。」