最強後備殺手　杜沙特入波創紀錄

阿仙奴能夠喺歐聯8強首回合主場逼和拜仁慕尼黑，翼鋒李安度杜沙特居功厥偉，呢位29歲比利時國腳後備上陣射入扳平2比2，佢今季各項賽事有6球係後備上陣射入，屬於歐洲5大聯賽球員之冠，名副其實係最強後備殺手。

阿仙奴領隊阿迪達慣用加比爾馬天尼利、布卡約沙卡擔任正選左右翼，李安度杜沙特往往只能做副選，但每次後備上陣都交足功課，甚至改變戰局，包括上年9月英超作客愛華頓，後備上陣射入全場唯一入波，其後作客車路士，都係後備上陣入波協助兵工廠逼和2比2。

除此之外，李安度杜沙特今仗入波之後，今屆歐聯4次主場上陣都取得入球，成為賽事史上第4位歐聯首4場主場上陣有「士哥」嘅球員。