艾摩廉講流利英文　般費撐夠料教英超

近日盛傳士砵亭教練魯賓艾摩廉同利物浦達成口頭協議，下季將會接班高普執教「紅軍」，據報呢位39歲少帥講到一口流利英文，效力曼聯嘅前士砵亭中場般奴費南迪斯，亦大讚呢位葡萄牙教頭有料，可以喺英超發光發熱。

利物浦斟沙比阿朗素失敗，據報已同艾摩廉就3年合約達成口頭協議，由於艾摩廉嘅球員同執教生涯幾乎都喺葡萄牙，唔少球迷擔心佢去英超會溝通不良，不過英國傳媒起底，指艾摩廉喺2019年去愛爾蘭考教練牌，同路爾斯加西亞等人一齊上堂，而且早練到一口流利英文，之前唔需要翻譯就接受英國傳媒訪問，溝通絕對冇問題。

對於艾摩廉可能做利物浦教練，曼聯隊長般奴費南迪斯亦讚不絕口：「我當然想佢留喺士砵亭，但如果佢選擇行下一步，佢絕對夠料喺英格蘭、法國或者西班牙取得成功，一切都要等球會之間嘅協商，同埋有冇人願意畀士砵亭要求嘅買斷費。」據報艾摩廉合約有1,700萬鎊買斷條款，如果利物浦決定啟動，艾摩廉會成為英超最高轉會費領隊。